1Current Verse · ప్రస్తుతం పారాయణ
ambā śāmbhavi candramauḷirabalā'parṇā'umā pārvatī
kālī haimavatī śivā trinayanī kātyāyanī bhairavī ।
sāvitrī navayauvanā śubhakarī sāmrājyalakṣmīpradā
cidrūpī paradevatā bhagavatī śrīrājarājeśvarī ॥ 1 ॥
2
raktāmbhīruhadhāriṇīṃ maṇilasadbhūṣāṅkakāntiprabhāṃ
padmākṣaprabhavāṃ parātparamayīṃ candrāṃśubhāsvadvarām ।
vāgdevīgaṇasevitāṃ smitamukhīṃ mandāramālādharāṃ
cidrūpīṃ paradevatāṃ bhagavatīṃ śrīrājarājeśvarīm ॥ 2 ॥
3
kalyāṇaṃ kamanīyarūpamamalaṃ kāruṇyavārāṃnidhiṃ
kāmeśapriyakāminīṃ kalikalaṅkoddhāridīkṣāvatīm ।
kāñcībhūṣaṇamaṇḍitāṃ munivaraiḥ saṃstūyamānāṃ parāṃ
cidrūpīṃ paradevatāṃ bhagavatīṃ śrīrājarājeśvarīm ॥ 3 ॥
4
nityānandamayīṃ nirañjanaguṇāṃ nistulyarūpaprabhāṃ
niḥsaṅgāṃ nigamāntavedyacaritāṃ nityātmikāṃ nirguṇām ।
niṣkāmapramadārcitāṃ nijapadanyāsaprasannapradāṃ
cidrūpīṃ paradevatāṃ bhagavatīṃ śrīrājarājeśvarīm ॥ 4 ॥
5
mantrārādhanatatparāmaṇigaṇālaṅkārasaddīpitāṃ
mātaṅgīṃ madhumattamattabhramarījhaṅkārasaṅgītikām ।
māyājālavidāriṇīṃ madamadāṃ mātaṅgajālocanāṃ
cidrūpīṃ paradevatāṃ bhagavatīṃ śrīrājarājeśvarīm ॥ 5 ॥
6
brahmāṇīṃ kamalāsanāṃ suranutāṃ brahmādibhiḥ pūjitāṃ
vaikuṇṭheśvaravallabhāṃ vasumatīṃ vāgīśvarīṃ vaiṣṇavīm ।
vārāhīṃ śaradindusundaramukhīṃ vātsalyavārānnidhiṃ
cidrūpīṃ paradevatāṃ bhagavatīṃ śrīrājarājeśvarīm ॥ 6 ॥
7
śrīmaccakravihāriṇīṃ śukamukhīṃ śrīcakramadhyasthitāṃ
śāntāṃ śāradacandrakoṭisadṛśīṃ śāmbhavyanugrāhiṇīm ।
śokadhvaṃsaparāyaṇāṃ śubhakarīṃ śrīlalitāṃ mokṣadāṃ
cidrūpīṃ paradevatāṃ bhagavatīṃ śrīrājarājeśvarīm ॥ 7 ॥
8
yaḥ paṭhet prātarutthāya stotrametat samāhitaḥ ।
tasya gehe vasellakṣmīḥ vāṇī ca vadane vaset ॥ 8 ॥
॥ iti śrīmacchaṅkarācāryaviracitaṃ śrīrājarājeśvaryaṣṭakaṃ sampūrṇam ॥
