1Current Verse · ప్రస్తుతం పారాయణ
acyutaṃ keśavaṃ rāmanārāyaṇaṃ
kṛṣṇadāmodaraṃ vāsudevaṃ harim ।
śrīdharaṃ mādhavaṃ gopikāvallabhaṃ
jānakīnāyakaṃ rāmacandraṃ bhaje ॥ 1 ॥
2
acyutaṃ keśavaṃ satyabhāmādhavaṃ
mādhavaṃ śrīdharaṃ rādhikārādhitam ।
indirāmandiraṃ cetasā sundaraṃ
devakīnandanaṃ nandajaṃ sandadhe ॥ 2 ॥
3
viṣṇave jiṣṇave śaṅkhine cakriṇe
rukmiṇīrāgiṇe jānakījānaye ।
vallavīvallabhāyārcitāyātmane
kaṃsavidhvaṃsine vaṃśine te namaḥ ॥ 3 ॥
4
kṛṣṇa govinda he rāma nārāyaṇa
śrīpate vāsudevājita śrīnidhe ।
acyutānanta he mādhavādhokṣaja
dvārakānāyaka draupadīrakṣaka ॥ 4 ॥
5
rākṣasakṣobhitaḥ sītayā śobhito
daṇḍakāraṇyabhūpuṇyatākāraṇam ।
lakṣmaṇenānvito vānaraiḥ sevito
'gastyasampūjito rāghavaḥ pātu mām ॥ 5 ॥
6
dhenukāriṣṭako'niṣṭakṛddveṣiṇāṃ
keśihā kaṃsahṛdvaṃśikāvādakaḥ ।
pūtanākopakaḥ sūrajākhelano
bālagopālakaḥ pātu māṃ sarvadā ॥ 6 ॥
7
vidyududyotavatprasphuradvāsasaṃ
prāvṛḍambhodavatprollasadvigraham ।
vanyayā mālayā śobhitoraḥsthalaṃ
lohitāṅghridvayaṃ rājīvanetraṃ bhaje ॥ 7 ॥
8
kuñcitaiḥ kuntalairbhrājamānānanaṃ
ratnamauliṃ lasatkuṇḍalaṃ gaṇḍayoḥ ।
hārakeyūrakaṃ kaṅkaṇaprojjvalaṃ
kiṅkiṇīmañjulaṃ śyāmalaṃ taṃ bhaje ॥ 8 ॥
9
acyutāṣṭakaṃ yaḥ paṭhediṣṭadaṃ
premataḥ pratyahaṃ pūruṣaḥ saspṛham ।
vṛttataḥ sundaraṃ kartṛviśvambharaṃ
tasya vaśyo harirjāyate satvaram ॥ 9 ॥
॥ iti śrīmacchaṅkarācāryaviracitaṃ acyutāṣṭakaṃ sampūrṇam ॥
